صدمة_في_سفرية

صدمة_في_سفرية

- أسفي الأن -
2020-06-23T14:46:33+03:00
2020-06-23T17:18:42+03:00
عين على الفيس بوك
- أسفي الأن -23 يونيو 2020آخر تحديث : منذ 4 أشهر
hgj - أسفي الأن

زرت المغرب ورحت مكناس وكنا في يوم سبت ولقيت صديقي المغربي بيقولي تعالى نروح الحمام ؟
قلتله : ليه ؟ هو حمام البيت فيه مشكلة ؟
فقال : لا . تعالى نروح الحمام المغربي ، إنتم مفيش عندكم حمام مغربي ؟
قلتله : أنا بسمع عنه في الأفراح لما يكون أهل العروسة أغنية شوية ويحبوا يلمّعوها بتروح كوافير غالي ويعملوا لها حمام مغربي .
فقال : طيب اجهز عشان نمشي .
وأنا كنت أظن إن الحمام ده عبارة عن بانيو هنام فيه شوية ويحطولي رغاوي وشوية زيت تنعيم وورد لونه أحمر زي الأفلام كدة .
المهم رحنا للمكان ودخلنا قسم الرجال بعد ما صديقي الله يكرمه دفع للواحد 20 درهم تقريبا يعني 40 جنيه مصري . وبمجرد ما تدخل بتسيب تليفونك . وطلعت الدور الثاني أجهز .
لقيت صديقي بيقولي البس الشورت فقط .
نزلنا للدور الأرضي ودخلنا في باب مخصص للحمام وعينك ما تشوف إلا النور .
لقيت مدعكة بمعنى الكلمة . رجال من جميع الفئات العمرية شبه عرايا إلا مما يستر العورة وفيه 3 غُرف . كل غرفة بدرجة حرارة مختلفة . والحنفيات موجودة بكثرة جدا للمياه الساخنة والباردة وجرادل وصابون ودنيا تانية .
ولقيت ناس نايمة على بطنها وناس نايمة على ظهرها وفي ناس تانيين بيدعكو فيهم بانتقام . دعك غير طبيعي . وكان المنظر مرعب . وأنا شايف حاجات سودة بتخرج من أجسامهم مع الدعك . 😢
فقلت لصاحبي : أكيد الناس دي مش بتستحمى في بيوتها وبتيجي هنا كل شهر عشان تنظف جسمها .
فضحك وقالي حتى لو جيت هنا كل يوم وعملت نفس الموضوع هينزل منك وسخ وذلك لأن الحمام المغربي والصابون المستخدم بيجدد خلايا الجسم مع الدعك فأكيد الخلايا والوسخ هينزل .
فقلت في نفسي : يا دي الفضايح دا أنا آخر مرة استعملت ليفة خشنة لما كانت أمي بتحميني في الابتدائي بها وكأنها بتدعك ظهر حصان🐴 . وكان من علامات النظافة وجود تسلخات في الظهر والبطن والأرداف .👶
المهم . أنا شايف قدامي ناس لا ترحم وبيدعكو بكل قسوة . مع الاختناق والدوخة اللي بدأت أحس بيهم بسبب البخار وارتفاع درجة الحرارة .
دخلنا الغرفة رقم 3 وهي أشدهم أرتفاعا في درجات الحرارة .
دهنت جسمي كله بصابون لزج يشبه الطين وقعدت شوية . ولقيت صديقي بيقول : يلا عشان الراجل يدعكك .😳
قلبي وقع من الخوف وخرجنا للغرقة رقم 2 لقيت راجل طيب عمره تقريبا 70 سنة ففرحت وقلت الحمد لله هتكون إيده حنينة لأن عُمرُه لا يسمح بالقسوة والقوة في التعامل .
ولقيته بيقولي : نام على بطنك🙄 .. ودي أول مرة فيه حد يطلب مني الطلب ده .
نمت على بطني وعمي الحج اشتغل في الدعك والمساج ولأول مرة في حياتي أشوف رجلي عند قفايا ورقبتي بتلف 360 درجة ومفاصل جسمي كلها بتفرقع . اقتربت إني أبكي بدموع . ولقيت الراجل الطيب ده بيقولي استريح شوية واغسل بالمياه عشان نكمل .. 😬
قلتله تكمل مين يا عم الحج ؟! وخرجت من الحمام بزحف على بطني زي الأطفال🐢 وبعدين عرفت إن الحج يبقى بطل المغرب🇲🇦 في مصارعة البوكس .وأعاد ذاكرته كلها معايا .
طلعت للدور الثاني بسرعة أشم أكسجين لأني خلاص كنت هموت😰 .
بعد ساعة انتهى صديقي ومشينا للبيت وأنا مش مصدق إني خرجت من المهلكة دي . وكنت بقول “الحمد لله الذي أحياني بعد ما أماتني وإليه النشور”🤕
لكن في الحقيقة هي تجربة ممتازة وفعلا الحمام المغربي له فوائد جميلة . رحت الحمام وأنا عندي برد وخرجت منه وقد شُفيت بفضل الله . + تجديد الخلايا الميتة والنظافة . وغيرها…
وطبعا أهل المغرب🇲🇦 متعودين عليه أسبوعيا ومنهم بيروح مرتين أو أكثر في الأسبوع ..لذلك هم من أنظف شعوب الأرض…
منقول

رابط مختصر

اترك تعليق

يجب ان تسجل الدخول لكي تتمكن من إضافة التعليقات