عزالدين ضرفاوي *** الاسواق النموذجية جات فواحد الوقت بحسن نية على الاقل فالكلام الرسمي باش تنظم الباعة الجائلين وتحفظ كرامتهم وتطلق دينامية اقتصادية محلية ولكن فالواقع لي كيشوف بعينيه كيعرف ان بزاف من هاد الاسواق ولات عنوان للفوضى المقننة والابتزاز والريع باسم العمل الجمعويجمعيات تسيير الاسواق النموذجية لي مفروض تكون اطار تطوعي وتنظيمي ولات عند بزاف ديال الرؤساء مشروع مربح كيتبنى على ضهر البياعة والشراية وكيعيش من العرݣ ديالهم كراء شهري مساهمات اجبارية طلبات ما عندها لا سند قانوني لا محاسباتي وتحكم مطلق فالدخول والخروج والاستفادة والاقصاء
اليوم ما بقاش سر ان بعض الجمعيات كتتحكم حتى فمصير المستفيدين كاين لي يدخل وكاين لي يتقصى وكاين لي يتسد عليه الباب بلا سبب واضح غير حيث ما دخلش فالطاعة ولا ما دارش الخاطر ولا ما خلصش داكشي لي بغاو من تحت الطاولة
والاخطر ان بزاف من رؤساء الجمعيات هوا تاريخهم معروف في المدينة ملفات قديمة شبهات رشوة سوابق عدلية اسماء كيتعاودو فكل سوق نموذجي ومع ذلك كيبقاو هما نفس الوجوه نفس العقليات ونفس الاساليب
هاد الجمعيات هي السبب المباشر فالرجوع ديال الباعة للشارع العام حيث السوق ولا مقبرة اقتصادية ماشي فضاء منظم الكراء طالع التحكم خانق والابتزاز يومي ونتيجته ان التاجر كيخرج يحتل الزنقة باش يعيش
ولي كيشكك فهاد الكلام غير يمشي يشوف بعينيه شكون كيتحكم فعلا في اغلب الاسواق النموذجية وشكون المستفيد الحقيقي ماشي البائع الصغير بل اشخاص بعضهم عندو سوابق عدلية وبعضهم دار من رئاسة الجمعية مهنة قارة كيدخل منها اكثر من موظف فالدولة
كاين رؤساء جمعيات ولات الاسواق عندهم بحال ضيعة خاصة كيدورو عند المستثمرين باسم السوق النموذجي مرة خاصنا مسجد مرة خاصنا مرحاض مرة خاصنا اصلاح ومرة خاصنا كاميرات وانارة
فالوقت لي السيما كتخرج من الديبو وكتشد طريقها لدار الرئيس باش يكمل بها الفوقي
وفالوقت لي فلوس الاصلاح كتمشي تشري بقعة فالعشوائي
وفالوقت لي الكاميرات كتبقى غير حبر على ورق
هاد الشي راه ماشي اتهام جزافا راه كلام كيتقال فالاسواق فالزنقة فالمقاهي وبالاسم ولكن الصمت مفروض حيث الخوف والضغط والتهديد
السؤال الحقيقي اليوم
شكون كيراقب هاد الجمعيات
فين هي المحاسبة
فين هي المجالس المنتخبة
فين هي السلطات الوصية
ولا الاسواق النموذجية كتبقى غير مشروع اجتماعي فالورق وريعا منظما فالواقع
الي بغى يكذب هاد الكلام ما عليه غير يمشي يشوف بعينيه
واللي عندو ضمير خاصو يهضر قبل ما يولي السكوت مشاركة
بلاما ندور على شي وحدين مستافدين هوا واختو ومرتو وبنتو على اساس كان معتقلي تازمامارت ،وسير على بركة الله
المصدر : https://www.safinow.com/?p=22881
عذراً التعليقات مغلقة